Edition

Donation de deux tableaux d'or de 1415 - édition
  • Edition

Nous Jehan, filz de roy de France, duc de Berry et d’Auvergne, conte de Poictou, d’Estampes, de Boulongne et d’Auvergne, congnoissons et confessons avoir eu et receu de noz chiers et bien amez les tresorier et chapictre de nostre chapelle de nostre palais de Bourges par la main de nostre amé et feal conseillier maistre Arnoul Belin, tresorier d’icelle1, deux tableaux d’or garniz de perrerie desquelz la declaracion s’ensuit. Premierement ung grant tableau d’or ancien fait en maniere de treillis d’un pié et demi de hault et d’un pié de large ou environ, ouquel par devant est nostre Seigneur en la croix et aux coustez nostre Dame et saint Jehan faiz en maniere de haulte taille et est garni ledit tableau de trante et trois balaiz1 que gros que petis, trante et ung saphirs dont il en y a trois plus gros que les autres et de soixante dix sept perles que grosses que petites, et siet icellui tableau sur trois piez de mesures en maniere de deux arcs voultis ; lequel tableau ainsi garni comme dit est nous achaptasmes avecques un autre de Cendre Billot aux estraines le premier jour de janvier l’an mil CCCC et huit. Item un autre grant tableau d’or de haulte taille d’ancienne façon, ouquel par devant est la resurrection nostre Seigneur et plusieurs ymages entour garni de celle part de dix huit balaiz de plusieurs façons, vint six saphirs, six esmeraudes, onze petis camahieux et sept vins deux perles que grosses que moiennes que petites de petite valeur, et siet sur un pié d’or en façon d’un chastel a quatre tournelles dont la porte est d’une perre noire entaillee du baptisement nostre Seigneur, et aux coustez a quatre grans camahieux, et ou darriere dudit tableau a tout au dessus une pierre de Cassidoine creuse escripte entour, et en descendant a une autre perre noire en façon d’une porte entaillee d’un ymage de Dieu qui tyre les ames d’enfer et se apparoist a la Magdlene  et y a escript : « Quem queris Dominum meum »2, et en descendant plus bas a un ymage de saint Mathieu, un autreb ymage appellé Egippus3, roy d’Ethiopie, et un autre appellé Beor4, et ou darriere du pié a une croix garnie de menue perrerie de voirre5, lequel tableau ainsi garni comme dit est madame la royne de France nous donna a Melun6 ou mois de juing l’an mil CCCC et ung. Lesquelz deux tableaux d’or dessus diz par nous ainsi euz et receuz de nostredicte chapelle par la main de nostredit conseillier comme dit est nous donnasmes le jour du Saint Sacrement derrenier passé7 a nostre tres chier et tres amé neveu monseigneur de duc de Guienne. Et d’iceulx tableaux nous tenons pour contens et voulons par ces presentes que iceulx tresorier et chapictre de nostredicte chapelle et tous autres a qui il pourroit compecter et appartenir en soient et demeurent quictes et deschargiez partout ou il appartendra sanz aucun contredit ou difficulté, et sanz ce que jamais on leur en puisse aucune chose demander. Donné a Paris, en nostre hostel de Neelle8, le Vme jour de juing, l’an de grace mil CCCC et quinze.

(En bas à gauche :) Par monseigneur le duc.

(Signé :) J. Vignaut.  

 

 

1. Arnoul Belin est désigné trésorier  de la Sainte-Chapellele 10 mai 1404 (Arch. dép. Cher, 8G 1452, cote M, cité par Fr. Lehoux, Jean de France, duc de Berri…, III, p. 15). Il est signalé comme conseiller du duc en 1401 (Fr. Lehoux, op. cit., II, p. 462, n. 5).

1. Des balais sont des pierres précieuses rouges, des rubis : DMF (http://www.atilf.fr/dmf/definition/balais).

2. Citation condensée de Jn, 20, 15 et 13.

3. Roi d’Éthiopie converti par Matthieu.

4. Béor, père de Balaam (Genèse 36, 32 ; Nombres 22, 5).

5. Il s’agit d’ivoire.                                                   

6. Melun, Seine-et-Marne, ch.-l. dép.

7. 30 mai 1415.

8. Hôtel de Nesle, résidence du duc à Paris.