Parties du discours

Désignation neuf procureurs - parties du discours
  • Parties du discours

Suscription

Jehan, fils de roy de France, duc de Berry et d’Auvergne, conte de Poictou, d’Estampes, de Boulongne et d’Auvergne

Adresse universelle

a tous ceulx qui ces lettres verront

Salut

Salut

Exposé

Comme par noz autres lectres en laz de soie et cire vert nous aions donné, pour l’augmentacion et accroissement de la dotacion de nostre chapelle nouvellement fondee et instituee en nostre palais de Bourges, aux tresorier, chanoines, vicaires et autres personnes establiz pour faire le divin service illec entre autres choses noz chasteaulx, villes et chastellenies de Buxueil et de Villeneuve, et pour ce que nous desirons nostredit don sortir son plain effect et qu’ilz en joïssent a plain, nous, occupez de plusieurs grosses besongnes pour lesquelles ne pouvons a present vacquer en propre personne pour bailler la reelle et corporelle possession et saisine d’icelles et en faire la desmission de la foy la ou il appartendra

Dispositif

nous, de nostre certaine science, avons fait, constitué et establi, faisons, constituons et etablissons par la teneur de ces presentes noz procureurs irrevocables noz amez et feaulx conseilliers maistres Pierre Trousseau, arcediacre de Paris, Guillaume le Tur, Guillaume Guerin, Guillaume de Blet, Jehan de Perelles, Jehan Rabateau, Jehan Guerin noz procureurs en parlement, Guillaume Baston, Jehan Dorider et chascun d’eulx pour le tout en telle maniere que la condicion du premier occupant ne soit mie la meilleur mais ce qui par l’un d’eulx aura esté encommancié puisse par l’autre estre poursui et mené a fin, ausquelz noz devant diz procureurs et chascun d’eulx pour le tout nous avons donné et donnons plain povoir, auctorité et mandement especial de eulx desmectre et descharger ou nom de nous et pour nous des saisines et possessions desdictes terres, fiefz, justices et de touz autres droiz et appartenances d’icelles quelconques elles soient et des fiefz et hommaiges, respiz ou souffrances en quoy nous sommes d’icelles envers ceulx qu’il appartient d’en bailler reaulment et de fait la reelle et corporelle possession et saisine auxdiz tresorier et chanoines de nostredicte chapelle ou a leur procureur pour eulx, de requerir qu’ilz en soient revestuz, mis en respit ou souffrance, par cellui ou ceulx qu’il appartendra ; et generalment de faire toutes autres choses qui ou fait dessus dit sont et seront necessaires et convenables et que nous ferions et pourrions faire se presens y estions en nostre propre personne combien que elles requissent mandement plus especial

Clause de promesse

Promectans en bonne foy a avoir agreable et tenir ferme et estable a tousjours tout ce qui par nozdis procureurs et chascun d’eulx aura esté fait et procuré sur ce que dit est, sanz jamais venir encontre par quelque maniere, tiltre ou raison que ce soit

Corroboration probatoire et annonce du sceau

En tesmoing de ce, nous avons fait mectre nostre scel a ces presentes

Date de lieu et de temps

Donné en nostre chastel de Mehun sur Yevre, le IIIIe jour de mai, l’an de grace mil quatre cens et cinq

Mention de commandement

Par monseigneur le duc

Signature du secrétaire

P. de Gyves